一眾金牌歌手將會參與公司舉行的爵士樂音樂會，到時大家唱的雖是其他歌手的作品，但會經過一番「改造」成為爵士樂，稍後還會配合音樂會推出唱片。古巨基、梁漢文、蘇永康和鄧健明等人自然歡喜，crossover唱出不同歌曲，但最開心還是可以和同事們聚首一堂。
古巨基、梁漢文、蘇永康、鄧健明、雷頌德和側田等人，日前為了所屬的金牌唱片公司於3月17日在灣仔會展舉行的「芝華士醇音樂會」拍宣傳海報。今次演唱會以light jazz音樂為主，該公司歌手們將會以這個風格唱出自己喜歡的音樂，如古巨基揀選了杜德偉的《愛已變了世界襯衣》、傅穎則挑選了周慧敏的《自作多情》等等，而且歌手們還會crossover演繹一連串歌曲。
盼出爵士大碟
蘇永康和古巨基都希望可以推出一張全爵士樂唱片，古巨基說：「我一路都有呢個諗法o架，但係要啲時間同公司傾吓，攞一個平衡位，呢個project要長遠咁去傾，小心啲，但呢個一定係我嘅目標。」蘇永康則說：「之前我都出過一隻類似嘅唱片，成績都幾滿意。近年我好欣賞一班唱作新人，好似張敬軒、方大同同謝安琪，佢哋好有自己嘅風格，所以我張新碟都搵方大同作首歌o架。」
眾歌手知道有機會聚首一堂感到興奮，古巨基說：「今次個騷可以同公司嘅同事合作，平時我哋有機會都係傾吓偈、打吓機，o依家可以合作都幾新鮮，都算幾難得o架。一向我哋公司都好團結，喺Paco（黃柏高）帶領之下，個個都好似一家人。」
有時候Paco會相約旗下歌手們聚餐，但梁漢文謂與朋友見面很少會喝太多酒，他和鄧健明更互爆大家醉酒後的笑話，鄧健明說：「當佢突然間好似變咗一個小朋友，又亂講話我贏咗世界冠軍為港爭光，我哋就知佢飲得差唔多，睇見佢就覺得搞笑。」梁漢文也說：「我飲好少就醉，醉咗個人就成日笑，變咗一個14、5歲小朋友，仲會跑嚟跑去，試過睇世界盃比賽，嗰場係意大利對法國，開場冇幾耐我已經飲醉，仲跑咗出街，當時嘅片段有啲模糊，好在都睇到施丹嘅頭槌。」
《鬼馬男》古巨基和雷頌德（圖）等埋位拍海報時整古做怪，相反梁漢文和側田則一臉正經。
沒有留言:
發佈留言