2007-02-07 新聞報導

蘋果日報 - 馮 仁 昭 四 圍 超 ： 雷 頌 德 換 車 換 樓 迎 新 婚

雷頌德（Mark）即將同模特兒女友梁家玉（Jade）拉埋天窗，為咗迎接老襯生涯，佢舊年已經換樓又換車，10個月之內就用咗成95萬買咗兩部水貨車，香港仲未有得賣o架！

女友生日做車牌

其中一部係Chrysler 300C型號，呢部仿古車外形優雅，Mark對佢一見鍾情，聽聞佢係全港首位訂呢部車嘅車主，車價大概62萬，Mark仲專登投咗個有雙重意義嘅「LU 147」車牌，前面嘅英文加數字「LU1」望埋似佢個姓「雷」英文串法「LUI」，而7月14係佢女友生日日期，真係有心思。
至於另一部車就係福特Mustang GT，車價約33萬，被形容為純美式跑車，車牌亦都用上Mark英文名縮寫嘅「MR」字頭，愛車如命嘅佢早排揸新車返灣仔錄音室，見佢對部車又捽又抹，直情當正老婆咁錫添呀。

張燊悅遙送祝福

除咗買新車之外，Mark本來同女友喺九龍塘舒梨道獨立屋同居，但近月佢哋喺九龍塘半山郝德傑道嘉珀山築愛巢，同衞蘭衞詩做埋鄰居，嘉珀山單位面積大部份過2,000尺，租盤平均5萬以上，都相當豪o架！
曾經同Mark拍過七年拖嘅張燊悅，近排喺美國羅省忙緊電影發行工作，噚日朝早馮仁昭同佢傾開長途電話，佢聽見對方婚訊後都戥佢開心。對於Mark拍拖兩年就結婚，張燊悅就話：「佢都係個成熟男人，會知自己要啲乜嘅。」至於張燊悅有冇諗過同男友楊哲安結婚？佢只係哈哈笑：「唔知，都冇人求婚，暫時專注事業先啦。」


雷頌德將會同拍拖兩年多女友Jade註冊結婚。



雷頌德早幾日住佢部福特靚車返錄音室，落車時幾咁依依不捨。